東華三院新主席李三元上任無耐，就爆出嗇色園與東華三院就黃大仙祠善款箱問題發生爭拗，有傳嗇色園指每年六百萬元善款收歸東華三院帳內，對嗇色園不公平，建議廢除當年嗇色園與東華之間簽訂嘅「不平等條約」，究竟點樣收科呢？李三元就話現時積極解決問題，至於係咪要對簿公堂，李三元就希望以和為貴，皆因大家都係慈善團體，目的都係想做善事啫！
東華三院上周登報向公眾交代事件，盤古初開講番東華與嗇色園及黃大仙祠嘅淵源，話該院在一九五六年獲華人廟宇委員會授權管理黃大仙祠，批准向入祠人士收取入園費一毫，並獲准放置捐款箱，清楚寫明善款用作資助東華三院嘅教育經費。事到如今，民政事務局有責任主動調停事件，惟當局一直處於被動角色，如果爭拗搞到對簿公堂，隨時引發新光戲院續約事件後另一場政治風波，到時唔知點收科。