卓妮尋日遇到Moses去香港會食晏，一見佢就想起蘇格蘭靚聲村姑Susan，皆因Moses本身都好鍾意唱歌，六歲時已在教堂唱詩班表演，大學開始唱歌劇，最擅長唱男高音，每年聖誕節都會帶隊去唱聖詩報佳音，最矚目表演就係○五年在莫華倫執導嘅歌劇《杜蘭朵》中扮演皇帝角色，所以Susan嘅歌聲揚威全球，Moses梗係有留意啦。

才華好難比較

不過，Moses首次聽到Susan嘅歌聲，並非透過電視或網上觀看，而係有次公幹搭飛機，坐在隔籬嘅外籍人士主動話有好嘢介紹畀佢，一看之下原來係Susan嘅參賽片段，聽落覺得把聲好靚，於是開始留意Susan一舉一動，一直追到總決賽。對於Susan失落王者寶座，Moses唔覺得可惜，他坦言，Susan決賽表現確係有啲遜色，但有時身體狀態和聲線水準係好難講嘅。

Moses鼓勵Susan話：「有時你話自己叻，有人會叻過你；你話自己差咩，又有人差過你喎，所以才華係好難比較，況且咁多人參加比賽，取得亞軍已經算係好好成績了！」Moses仲話，如果Susan有朝一日出唱碟，佢一定捧場買番隻喎。

卓妮