去年中，CY搶先公布擔任火炬手之一，又公開批評工資保障運動成效不彰，自此之後，政界已經將佢嗰句「Ｎ屆都唔選特首」拋落垃圾桶。踏入○九年，CY愈嚟愈擺明車馬，寫網誌、搞環保、向政黨拉票，身影無處不在，上月財爺「派糖」，有人鬧港府因政治壓力屈膝，CY亦撰文批評，話政治唔係請客食飯，重大問題，日日請食飯都解決唔到㗎；又話政治人物應敢於擔當政治風險，佢踩緊邊個，畫公仔唔使畫出腸啦！

論壇上口若懸河

唔知係咪CY辣㷫同僚，佢尋日出席一個兩岸論壇嘅時候，對傳媒全程封嘴，但上到論壇，又係另一個人，口若懸河，大談兩岸經濟融合，仲扯到近年支撐香港旅遊業半邊天嘅個人遊政策。佢搬晒啲數據，指○三年至今，每年有一千萬名內地客訪港，經濟效益數以千萬元計，跟住話鋒一轉，披露原來○三年香港經濟奄奄一息嘅時候，老董曾經派佢同兩名特首辦助理，一行三個人秘密上京斟談ＣＥＰＡ，尤其係個人遊措施。

舊事重提 用意何在？

CY話當年，憶述當日係星期日，天氣很冷，喺一位內地高官家中商談。高官問佢：有香港人顧慮個人遊引起治安問題，到底港府諗定未㗎？CY就拍心口，話如果中央願意放行，一切唔係問題，咁就促成落實個人遊喇！佢提番陳年舊事究竟有乜用意，大家不妨慢慢咀嚼。

CY仲愈講愈興奮，講埋六年來自己一直推動香港專業人士打入內地市場，初時被人鬧無嘢攞嘢嚟做，事實證明佢無錯，佢做主席嘅香港專業聯盟十大業界中，一半依家喺內地搵錢多過香港。CY話，中港融合喺香港政壇係「Dirty words」，好似唔係好嘢，怕影響一國兩制，其實事在人為啫。言下之意，即係叫大家唔使怕；CY呢番宏觀政治理念，唔知係咪日後參選特首嘅政綱範本？不過會後記者問佢怕唔怕呢番話令人聯想到係為選特首鋪路，佢就一味「No，No，No！」之後揚長而去。