黎專員主動調查，係咪回應功夫茶呢？咁又唔係，其實係因為舊年八月發生嘅旺角卡拉ＯＫ五級大火。黎年話呀，旺角嘉禾大廈嘅一場火警，引起市民大眾對商業大廈消防安全嘅廣泛關注，亦令人質疑消防處嘅規管以及執法行動是否有效。調查亦會研究食環署嘅發牌機制如何確保食肆嘅消防安全合乎標準。
對於申訴專員嘅調查，功夫茶舉腳贊成，如果查到有乜甩甩漏漏，更加會封黎年做偶像。喂，嘉禾大火幾得人驚呀，燒到火紅火綠唔在講，最可憐嘅係導致兩名英勇消防員蕭永方同埋陳兆龍殉職。
每逢天災人禍，特區政府冇嘢叻，整色整水最巴閉。嘉禾大火之後，政府成立跨部門小組嘗試補鑊，陣容好鼎盛㗎，又有消防處，又有食環署，又有屋宇署，又有民政事務總署。
結果係點呢？嘉禾大廈嘅防火設施有冇改善呢？鄰近地區油尖旺嘅娛樂場所有冇違規呢？去旺角唱Ｋ，使唔使擔驚受怕呢？
其實唔使多講，官僚做事永遠都係官樣文章。本報記者前一排曾經去過現場視察，有啲卡拉ＯＫ，防煙門係鎖咗嘅；有啲夜總會，走廊係擺滿啤酒樽嘅；有啲娛樂場所，後樓梯係充滿大堆雜物嘅。一句講晒，火燭唔知點走鬼！
防火條例點解有等於冇呢？巡查點解又係得過且過呢？冇辦法，各自為政吖嘛。根據現行發牌制度，食環署淨係負責發小食及卡拉ＯＫ牌，民政事務總署只係負責會所許可證，消防處就負責發出消防安全證書。表面上好多人負責，實際上個個懶得就懶，淨係識交波。
冇錯，消防處係要巡查嘅，睇吓商業大廈有冇阻塞逃生通道吖嘛，不過咯喎，「巡」呢家嘢好彈性嘅啫，地氈式驗屍咁驗又係巡，(目及)一眼收工飲茶又係巡。
講到呢度，功夫茶諗起兩句名言：今天不努力工作，明天努力找工作。呢鋪真係現眼報咯，消防處冇努力巡查吖嘛，咁就要勞煩申訴專員努力查一查消防處。
話時話，政府餐餐成立跨部門小組嘗試解決問題，問題到底有冇解決？跨部門管理全港樹木，大樹冧完一棵又一棵；跨部門抗擊金融海嘯，飯碗爛完一個又一個。至於跨部門防火咯，求神拜佛，千祈唔好燒完一鑊又一鑊！