一代幾何大師陳省身嘅女兒陳璞尋日訪港，現身科大宣布以爸爸名義成立全球數學大獎——陳省身獎，陳璞丈夫兼科大校長朱經武當然畀面撐場。
呢個獎將會由國際數學聯盟頒發，級數相當於數學界嘅諾貝爾獎，獎金由朱太自掏腰包攞五十萬美金（約三百九十萬港元）出嚟，獎項每四年頒一次，認真揼本。朱太話，爸爸生前落力推動數學發展，好想盡點孝心紀念吓佢。
朱太咁支持數學仲有另一原因，查實佢自細係資優兒童，佢話爸爸自細冇特訓秘方，但體內嘅數學基因細細個就爆發出嚟，佢自爆三歲就識得解答小六學生雞兔同籠嘅數學題，連陳父都嚇咗一跳，不過呢股才華自三歲後就走下坡，所以長大後冇揀做數學家，而係走去修讀物理並認識老公朱經武。朱太年前投身銀行界，喺美國開咗幾間銀行，名為「MetroBank」，聽講搞得有聲有色，朱太身家閒閒哋有過億元，數口精叻果然有着數。
講起佢同朱校長嘅情緣，卻並非緣於數學，朱太話，因為自細喺美國讀番書長大，唔識睇中文，偏偏爸爸鍾意去中國餐館請客，所以佢立志要搵一個識中文嘅老公幫手睇餐牌點菜，朱經武因為中英文了得，就係咁奪得佢嘅芳心嘞。