被人敬稱「大姐」嘅戴婉瑩三月底卸任申訴專員，不過，佢敢言炮轟政府部門嘅作風，仍然為人津津樂道，搞到佢嘅下手黎年，一上任就有壓力。黎年尋日初試啼聲，首次以申訴專員身份見記者，普通話水平不幸露底，聽唔明講普通話嘅記者關於金融申訴專員嘅提問，又三次將「雷曼兄弟」讀成「瀰漫兄弟」，令人忍俊不禁。
香港回歸就快踏入第十二個年頭，特區官員或者法定機構阿頭喺公開場合搞唔掂「煲冬瓜」，有時真係幾尷尬。申訴專員公署尋日匯報新一批投訴政府個案，黎年嘅表現較佢嘅前任木訥，半桶水嘅「煲冬瓜」更加露晒餡，場面相當搞笑。
有講普通話嘅記者問黎年，對政府計劃成立金融申訴專員點睇，其實，問題字眼唔算生澀，但係黎年聽到耳都側埋，要身旁嘅調查主任打救；記者再問佢雷曼迷債投訴，呢次調查主任識做主動提場：「係問雷曼。」不過都救唔到黎年，黎年嗰句「瀰漫兄弟」，搞到在場人士好多都忍唔住低頭偷笑，最辛苦係佢隔籬嘅調查主任，相信佢忍得好辛苦。
唔經唔覺，退休前係財經事務及庫務局常任秘書長嘅黎年離開咗政府差不多兩年，尋日所見，黎年發福咗，睇起嚟富泰咗。