港大民意網站定期為香港政團做民調把脈，睇吓佢哋嘅民望升跌，○九年五月份嘅調查結果尋日出爐，十大政團嘅評分上升居多，不過，社民連同民建聯就做咗逆市「雙葩」，評分齊齊大跌，前者仲係跌落到民調計劃○七年二月開始為社民連評分以嚟嘅歷史低點添。
根據民意計劃嘅調查，評分最高嘅政黨，仍然由兩個工會當道，工聯會摘冠，職工盟排第二，得分都超過五十分。至於三個月前排位第三嘅民建聯，評分則下跌一點七分，得番四十八點七分，跌出五大之列，排名第六；社民連仲大鑊，急跌四點二分，以三十九點六分掹車邊排喺十大政團之末，排位倒退兩級，民調機構指，社民連排名大倒退，好可能係因為部分成員涉及「粗口事件」有關喎。社民連同民記平日喺議會敵我分明，估唔到喺今次民調會做咗難兄難弟。