立法會早前有個考察團去廣東省四個地方考察，謝偉俊（Paul）都係成員之一。阿Paul話自己成日都同白姐姐嚟廣東玩，對廣東一啲都唔陌生，仲話喺中山大學附近嘅金海灣有個單位，依家丟空咗。考察團有個夜遊珠江嘅節目，阿Paul話當條船去到中山大學附近嘅時候，佢都有望多兩眼，本來諗住順便去個單位睇吓，不過行程實在太緊密，惟有作罷。
阿Paul同白姐姐嘅感情生活曲折離奇，仲話結婚係為咗帶挈白姐姐攞居英權，兩個人最穩定嘅關係，可能就係時常結伴出外旅行。阿Paul透露，諗住趁遲啲立法會休會同白姐姐去英國愛爾蘭散心兼遊玩，仲話一早已經計劃好，絕對唔係「箍煲之旅」。
世界各地都有唔少物業嘅阿Paul同白姐姐最鍾意旅行加睇樓，唔知今次係咪有意喺愛爾蘭置業呢？阿Paul就笑笑口話到時會去睇樓都唔出奇。