瑞士勞力士名錶用家投訴手錶維修後，錶帶無故被刻上「神秘號碼」事件，引起錶迷議論紛紛。雖然話勞力士方面肯補救，但如果隻錶有紀念價值，就算換過隻新錶都好肉赤，好似香港體育學院主席李家祥（Eric）和漁農界立法會議員黃容根就係好好嘅例子。
卓妮尋日遇到香港教育學院主席張炳良和身兼校董會司庫嘅Eric去香港會所食晏，講起勞力士「神秘號碼」事件，Eric都話屋企收藏一隻父親留下嘅金勞力士「家傳之寶」，好有紀念價值，幸好隻金勞至今仲保持得好新淨，運作暢順，毋須維修。
Eric本身對戴錶無乜要求，睇到時間就得嘞，手上戴緊嘅係一間銀行紀念錶，錶上日子顯示仲停留喺五月廿九日，不過時間就係準確嘅。張炳良就話自己唔戴金勞，平常都只係戴普通嘅石英錶啫。
黃容根嫌墜手
黃容根屋企都收藏咗兩隻鑲嵌鑽石嘅「金銀膶」，擺咗十幾年都未試過攞去抹油或維修，當年同太太用十幾萬買落，好有紀念價值，將來諗住傳畀下一代。不過，卓妮見根哥手上只係戴緊○五年ＷＴＯ（世界貿易組織）會議嘅紀念錶，莫非因為隻勞太貴重唔敢戴出街？根哥解釋，全因為隻勞太重，所以好少戴，只係特別日子才戴出來曬吓太陽。
金勞詹冇金勞
勞力士「神秘號碼」事件發生後，唔少人聯想起有「金勞詹」綽號嘅立法會議員詹培忠有無中招，但金勞詹澄清，「金勞詹」綽號純粹因為佢擁有勞斯萊斯豪華房車，其實一隻金勞都無。金勞詹又話，以前閒閒哋都戴幾十萬一隻錶，但依家希望低調啲，戴幾萬蚊貨仔就算，總之戴上手好睇嘅就會買，唔會理會乜嘢牌子。
至於立法會新丁議員陳克勤就嫌戴勞力士太過成熟，所以一直戴開瑞士ＩＷＣ（萬國），貪啲錶款睇起嚟比較後生，而價錢與勞力士不相伯仲。講到收藏名錶，克勤就珍藏一隻Omega Speedmaster Professional Snoopy限量版登月錶，多年前用幾萬元在網上投得，珍貴到自己都唔捨得用。
卓妮