本文重點
立法會自今屆開始每個議員享有大約二萬六千元醫療津貼，唔少議員睇完醫生都會將收據連醫生紙，一併呈交畀立法會秘書處申領津貼。我哋連日翻查議員醫療津貼申領表，發現班議員唔係有肩周炎就係膝頭痛，就連一向深諳養生之道嘅立法會保險界代表陳健波都患有血壓高，身體狀況認真麻麻。
陳健波天生高血壓
以申報津貼嘅次數嚟計，以李永達、李華明、涂謹申同何俊仁呢幾個議員最多，李永達嘅膝頭痛差唔多隔兩日就要覆診一次，李華明雖然冇乜大病，但就成日傷風兼有鼻敏感，涂謹申則有可能導致心血管病嘅Lipid disorder（血脂異常），何俊仁就要睇脊椎神經科醫生。至於一向重視身體健康嘅陳健波點解都有血壓高呢？陳健波解釋，佢呢個係遺傳病，所以佢點養生都避唔過，不過好彩病情好輕微，但血壓隨住年紀慢慢遞升，所以佢喺四年前決定服藥控制血壓。十幾歲開始打坐嘅陳健波話，除咗呢個斷唔到尾嘅遺傳病外，佢已經成年冇病過。
其實陳健波眼見立法會班同事身體咁差都有啲擔心，所以佢不時會充當健康大使宣傳做運動嘅重要性。佢記得有次開開吓會，聽到隔籬位嘅何俊仁呼吸聲好沉重，就知佢身體唔多妥，所以就勸何俊仁要多做運動。佢得悉同屬立法會研究雷曼事宜小組委員會成員嘅何鍾泰忙到一日只瞓得三、四個鐘，都忍唔住話何鍾泰「過度勤力」：「聽人講佢（何鍾泰）喺立法會永遠係最後一個離開，咁樣當然會過勞啦，我覺得佢應該要重新調整工作，減輕工作量先得。」
馮檢基因為跌傷右肩，舊年四月起一直睇中醫接受推拿，但係換咗六個醫生都冇好轉，佢因為用晒自己份保險，先焗住申領立法會醫療津貼。黃容根早前做過膝頭手術，佢最近就利用議員嘅「福利」，申領物理治療嘅費用。
議員申報醫療津貼嘅資料，一般市民都可以查閱，議員要申領醫療開支，代價就係預咗自己嘅病歷被公開。阿基話議員雖然係公眾人物，但病歷始終屬個人私隱，認為資料唔應該公開。陳健波雖然唔會因病況公開而唔申報津貼，但都覺得立法會秘書處要檢討現行做法，將敏感資料塗去。