立法會議員劉健儀（Miriam）做咗自由黨主席後，工作排到密麻麻，究竟有幾密呢？尋日見佢一個人企喺立法會對出港鐵站口，埋首望住張紙，追問之下原來佢想執靚啲工作安排，希望騰出更多私人空間畀自己，可想而之佢有幾忙。不過無論幾忙都好，Miriam話嚟緊有兩件大事非做不可，就係飛過美國探親，然後回港帶領自由黨員出外考察。
豬流感在歐美爆到七彩，Miriam仍堅持在八月底去美國探親，除咗擔心囝囝偉釗外，最主要係想探望年老嘅父母，特別係體弱多病嘅父親。Miriam話，父親曾經在四月中急病入院，出院後又再度入院，所以搞到佢非常擔心。為父母免受病毒感染，Miriam特別請咗兩個傭工每日為家居清潔消毒，照顧雙親嘅起居飲食。
至於另一項重要任務，就係安排自由黨一年一度嘅考察團。Miriam打算去完兩星期美國後，再回港帶領黨員出外考察，佢話考察係該黨傳統，唔想因為佢做咗主席後有所改變；但今年去邊度考察，還有待研究。