本文重點
賭王何鴻燊將於明日獲亞洲國際博彩博覽頒發卓越遠見成就獎，就喺頒獎前夕，其愛駒「爆冷」尋日向燊哥送上賀禮，贏得花旗集團冠軍暨遮打盃，連同贏得上次三冠大賽次關賽事，共獲六百萬元獎金。燊哥尋日在馬場表現得非常風騷，笑稱愛駒「爆冷」好似佢咁老當益壯，又話好似威士忌口號咁「Keep Walking」。
對新濠天地有信心
燊哥尋日拖埋四太梁安琪和愛女超雲入馬場，為愛駒「爆冷」同「爆炸」打氣，惟「爆炸」四甲不入，反而「爆冷」以次熱門姿態勝出。「爆冷」在衝線一刻，站在看台上嘅四太，一如既往表現得好興奮，肉緊到雙手緊捉燊哥膊頭猛搖，而超雲就笑到擘大個口，當時燊哥仲未睇清楚「爆冷」輸定贏，獲悉贏馬後先至展露四萬笑容，四太繼而與超雲擁作一團。
問四太如何慶祝？佢就話尋晚燊哥有朋友請飲，所以要揀過其他日子慶祝嘞。
至於嚟緊會否同燊哥去旅行，四太諗咗一陣然後話：「唔得喎！去唔到，因為七月澳門特首選舉，到時我哋好忙，好多嘢要做㗎！」
燊哥贏馬固然開心，但佢最雀躍嘅，係兒子何猷龍擔大旗嘅新濠天地度假村今日開幕，有賭場又有酒店，一應俱全。至於會否擔心經濟不景影響度假村生意，燊哥就好有信心，為猷龍打氣話：「應該唔錯，一定掂嘅！」
卓妮