最弊嗰班官員眼白白睇住藍天愈走愈遠，卻束手無策，淨係識阿茂整餅度咗個停車熄匙計劃，做騷當環保，用嚟遮醜。
唉，用吓腦諗諗都知，停車熄匙根本不切實際，的士及小巴團體仲唔群起攻之咩。當時功夫茶就已經講過，停車熄匙搞唔到環保之餘，仲會添煩添亂，無事生非，製造司機與乘客間嘅紛爭。嗱嗱嗱，話口未完，停車熄匙都未正式立法，已經有爭拗啦。
話說有個休班消防員喺去年深秋凌晨時分上咗一部停車熄匙嘅的士，佢一上車，即刻覺得車廂好焗，想落車搭過第二架的士，點知就同司機嘈起上嚟，搞到要鬧上公堂。
日前，呢位的士司機被控一項無禮貌及不守規矩罪成，罰咗一千二百元。佢話做咗職業司機八年，平日為咗慳油都會停車熄匙，第一次有乘客不滿車廂悶熱引起爭執。佢仲講到明呀，經過呢次教訓後，唔會咁笨再停車熄匙㗎嘞，以免唔衰攞嚟衰再惹官非。
邱騰華收到未呀？唔理環境局做咗幾多研究，都唔夠呢單個案咁活生生呀！吓，唔係啩，仲收唔到？好，等功夫茶不厭其煩再同邱局長上一堂課，等佢知道喺冷氣房閉門造車度出嚟嘅屎橋係幾咁超現實。
課程一，知唔知停車熄匙嗰時，車廂溫度會有幾多度呢？
嗱，上述畸士發生喺深秋時分，都有人嫌車廂翳焗，香港夏天出晒名又濕又熱，閒閒地有攝氏三十幾度，咁就更加唔得掂。
有專家話喎，如果車廂空氣唔流通，加上陽光直射，車廂溫度可達攝氏四、五十度㗎！
曾經有位的士司機挑戰邱騰華，話唔使錢載佢遊一日車河，佢都唔敢接受挑戰。邱局長，你有冇聽過「己所不欲，勿施於人」呀？
課程二，到底停車熄匙係咪可以有效減低空氣污染呢？
有學者話，停車熄匙至少要維持三至五分鐘，至可以有效減低空氣污染，而且最佳成效只能夠減少唔夠百分之一嘅懸浮粒子咁大把。反而熄完又再撻番，唔止減少唔到污染，車輛引擎撻吓又熄吓原來產生仲多廢氣呀。
所以話，呢啲咁嘅百年不遇嘅屎橋，既唔治標，又治唔到本，反而仲會製造更多嘅社會矛盾。的士業界已表明，如果政府冥頑不靈係都要就停車熄匙立法，佢哋會抗爭到底。
唔好話功夫茶唔畀個溫馨提示呀，政府再唔理社會反對聲音一意孤行，到時嘅矛盾就唔單止係司機及乘客之間，政府與民為敵，多數冇乜好下場㗎！