在香港，做老鼠是幸福的，因為康文署治鼠無方；而在香港，做樹木是悲慘的，因為康文署斬樹斷估，係又鋸唔係又鋸。去年八月港大女生在赤柱慘遭病樹塌下壓死，揭發康文署管理樹木工作混吉混亂；如今前線員工又踢爆，該署怕麻煩，竟隱瞞白蟻蛀樹的嚴重，市民多番投訴，求其噴殺蟲水了事。
雨季來了，說時遲，那時快，何文田巴富街就塌下一棵大樹，險壓死一名的士司機。老朽一度懷疑唐唐「腳頭」好，自從佢做咗管樹大隊長後，一連塌了幾棵樹都係壓倒啲車，你話是不是要歸功於唐唐？（如有語病，當追究母語教學之失敗也。）
講開又講，塌樹接二連三之後，康文署如驚弓之鳥，開始做嘢啦！於嘉道理道塌樹現場，左右開弓，李逵上身，先斬落兩棵木麻黃樹，據悉一棵已嚴重蛀蝕，另一棵據云只係表皮侵蝕，相信「冇即時危險」，之不過，既有名校校長擔心師生安全，一於斬無赦！老朽相信這棵受株連的大樹，除了呼冤之外，必因只患了皮膚疥癬卻罪至連根拔起而死不瞑目，來生投胎只願做路邊草矣！當代詩人屈桂林有詩詠路邊草：「大路旁邊草，逢寒亦遇春。枯榮根底壯，瀟灑鬥風塵。」做一棵路邊草，咁就毋須壯烈犧牲喇！
如今，對園藝工程有認識的街坊又狠批康文署疑受社會壓力，一周內連斬三十棵樹，好似同綠色有仇咁。康文署署長周達明哥，老朽只想講個笑話你聽，希望你能悟道：新兵準備跳傘，教官打開艙門，最後叮囑：「一定要數到十以後再打開降落傘。」學員嚴格執行命令，一個接一個跳下，突然有個士兵驚呼道：「傑克一定會摔死的！」教官怒斥：「你胡扯甚麼？」士兵大呼：「因為他有嚴重的口吃！」
規則和程序是約束大眾的，但只有照顧到個體差異的規則才是完美的！但願此則笑話，能挽救幾棵綠色的樹魂。