豬流感殺到嚟，食物及衞生局副局長梁卓偉頻頻見報，政府跨部門小組嘅半例行新聞發布會，局長周一鑊經常龜縮唔見影，主持會議嘅重擔反而落喺梁卓偉身上，講親都係不是太開心嘢，幸好外界嘅反應都幾好，幾乎搶晒周一鑊嘅風頭。梁卓偉尋日做「擁抱健康生活博覽2009」嘅主禮嘉賓，同市民分享抗疫嘅心得，話終於可以做番啲開心嘢。
作為對抗豬流感嘅把關人之一，梁卓偉嘅工作量肯定比以前增加，但佢幾忙都會抽時間去跑步，保持身體健康，只係做咗副局長後，少咗參與踢波等團體運動，擔心太多嘢要做，應承咗人又要甩底，所以變相要孤獨做運動。保持身體健康之餘，梁卓偉話仲要多啲同朋友及屋企人傾偈，呢啲紓緩情緒嘅方法，同好多人差唔多。
不過梁卓偉仲有另一種保持心情愉快嘅方法，就係沉醉喺音樂。原來梁卓偉細細個就學鋼琴，小學已經喺名指揮家葉詠詩爸爸葉惠康創辦嘅「葉氏兒童合唱團」擔任男童女高音，去加拿大讀醫嗰陣，攞咗個音樂碩士，學埋指揮，仲擔任過加拿大葉氏兒童合唱團嘅首席指揮添。時至今日，佢都會抽時間出席音樂活動，仲鼓勵大家喺工作之餘要保持自己嘅興趣，去保持身心健康。