立法會近日推出新猷，破天荒推出「證人費」，等出席立法會研訊嘅證人可以申請津貼，彌補作供嘅收入損失。不過，呢個津貼額好貼近市場，最高時薪四十五蚊，比連鎖快餐集團嘅清潔工、侍應收入高近一倍，同千人爭崩頭嘅馬會兼職時薪同一水位。呢個安排會追溯至去年十月一日，即新一屆立法會開始工作以來嘅研訊都可以申領。
今年以來，立法會先後組成小組委員會及專責小組就雷曼迷債、梁展文事件展開研訊，加埋因應一年兩度審計署報告展開嘅政府帳目委員會研訊等，立法會嘅研訊愈來愈多，立法會行管會遂開會研究，考慮到證人應召上庭可申領津貼，決定喺立法會引入相同安排，每位證人出席少於四小時嘅會議，可申索一百八十元津貼；多過四小時就可申領三百六十元，即係話最高時薪四十五蚊。不過，現職公務員、公職人員都唔攞得。
以近期雷曼同梁展文事件嘅研訊為例，金管局總裁任志剛出席雷曼事件調查就冇得攞津貼，但家族生意數以百億計嘅新世界中國主席鄭家純、以至新世界中國執行董事梁志堅、前房屋及規劃地政局常秘梁展文都可以申領津貼，所以佢哋都有機會試吓時薪四十五蚊嘅滋味，唔知感覺如何呢？