身兼骨科專科醫生嘅前醫院管理局總監高永文尋日喺一個健康生活博覽度舉行講座，同大家講骨質疏鬆症嘅成因同最新療法。佢話自己五十有一，加上男人都有更年期，同好多人一樣，佢都擔心自己會患上骨質疏鬆症。正所謂「預防勝於治療」，高醫生話自己後生嗰陣已經常做負重運動，好似多行路，每日又食豆腐、飲豆漿，以吸取鈣質，防止骨質疏鬆症。
高醫生話，骨質疏鬆症最慘就係無明顯病徵，所以事先要做足預防。一般人好鍾意到健身室舉重，高醫生就覺得呢類運動好容易整傷身體，佢話行路其實都係負重運動嘅一種，一樣可以做到預防骨質疏鬆症，所以佢平時都有去行山觀鳥，參與慈善步行，總之成日行來行去，都做到一定嘅預防作用；大家心水清嘅可能會記得，香港防癌會去年首次主辦毅行者，高永文正係防癌會主席，佢又有參與苗圃行動嘅助學步行籌款。除咗做運動，高醫生又好注意飲食，每日都會飲一杯豆漿，吸取鈣質，如果大家想防止骨質疏鬆症，不妨偷吓師。