立法會秘書長吳文華（Pauline）自去年上任後，工作相當繁重，個人又要兼顧崇德社主席職務，所以一直無暇放假去旅行。Pauline於是瞄準今年立法會休會，計劃同一班相識幾十年嘅中學同學去歐遊兩星期，希望輕鬆番吓。至於粵語正音專家男友何文匯會否結伴同行，Pauline就好老實話：「我同同學去喎，梗係無佢份啦，唔預佢喇！」
崇德社尋日搞咗個「長者起居照顧一家親」研討會，Pauline分享心得時話，由於豬流感肆虐，佢都禁止年老嘅父母到人煙稠密嘅地方，早上晨運就例外。Pauline防疫咁嚴格，會否連自己都少咗去街呢？佢就好無奈話：「我依家呢份工仲邊有時間去街吖！」聽落都嚇一跳，去街都無時間，遲吓旅行又唔預男友，何博士豈不是孤伶伶好陰功？
不過，Pauline就算幾忙都好，每星期都堅持抽時間陪兩老去飲茶傾吓偈，稱得上孝順女，但佢話兩老有時仲忙過佢，除咗鍾意耍太極和唱卡拉ＯＫ外，又鍾意跳社交舞，例如Waltz（華爾滋）同Cha Cha等，佢哋仲好擅長添。Pauline咪承傳咗兩老嘅舞林絕技？點知佢話：「我唔得嘅，無天分，所以無學到！」真係嘥晒。