本文重點
財政司司長鬍鬚曾上周二舉行記者會公布加碼紓困措施時，畀記者質問佢係咪欽點特首辦主任陳德霖接任金管局總裁，激到佢當眾發老脾拒答問題，之後又暗窒另一名記者唔識提出好建議，畀市民炮轟佢冇資格做財政司司長。鬍鬚曾尋日上電台接受訪問，就改以耍太極嚟迴避同一問題，又借出訪歐洲，變身閃電俠逃避列席立法會有關聘請金管局總裁嘅休會辯論。
我哋尋日啱啱寫過，鬍鬚曾涉嫌隱瞞公眾同立法會，喺半年前暗中成立一個三人小組，以黑箱作業嘅手法欽點攞命陳接替任總，結果畀泛民議員咬住上，要求喺周三嘅立法會緊急辯論呢次事件。部分親政府議員雖然把口就話冇咁嘅需要，但亦冇投票反對進行辯論。
點解政府今次會咁順攤呢？原來鬍鬚曾一早定咗聽日起出訪俄羅斯同歐洲，仲一去就去十二日，由俄羅斯、北歐嘅瑞典、到西歐嘅英國，一次過玩勻成個歐洲大陸。立法會揀喺周三辯論金管局醜聞，真係唔遲唔早，時間啱啱好，鬍鬚曾自然舉腳贊成。
鬍鬚曾尋日出席電台節目時，就聲稱好希望親身列席辯論回應議員批評，但由於今次外訪早喺幾個月前定好，佢冇辦法喎。不過當主持人再次問番欽點攞命陳嘅內情，鬍鬚曾就立即變臉，重申單嘢仲有啲程序未完成，依家唔方便講任何嘢。主持人就窒佢學嘅其實唔係西洋劍同洪拳，而係另一種中國武術耍太極！
傻強做替死鬼
講開鬍鬚曾，早前有議員投訴鬍鬚曾夾埋商務及經濟發展局局長劉吳惠蘭（Rita），企圖跳過立法會正常程序，盡快為中小企加碼貸款計劃申請撥款。經過一輪明查暗訪，原來Rita係食咗死貓，事關為呢個計劃出面向立會申請豁免嘅，係財經事務及庫務局局長陳家強至啱，佢日前已經去信財委會，要求豁免遵守必須喺開會前五日提交撥款文件嘅規定。不過斷估傻強亦只係奉鬍鬚曾嘅命令做嘢，最慘佢周三仲要以署理財政司司長身份列席立法會嘅辯論，幫鬍鬚曾做箭靶，真係黑狗偷食、白狗當災！