本文重點
香港總商會借理事會換屆大挫自由黨聲勢，事後傳出低票當選嘅自由黨前主席田北俊畀咗二百幾張授權票支持港鐵行政總裁周松崗入局，但對手就無借花敬佛回禮。卓妮尋日遇到周松崗到灣仔富豪飯堂「福臨門」食晏，問佢授權票一事，周總表現得毫不知情話：「授權票？我無喎！係咪誤會咗呀！」真係唔知邊個版本至啱。
周總反駁田少言論
田少曾經將今次「總商會事變」歸咎於自由黨走「中間偏右」路線，偏幫中小企，又成日上街示威，令大財團有所顧忌。對於田少呢番言論，周總與總商會主席包立賢早前發表嘅言論同出一轍，強調商會內二千多名會員來自各行各業，大家都希望爭取理想嘅營商環境，並非偏幫大財團，亦非忽略中小企。周總咁講，等於反駁田少嘅兩極化言論。
事到如今，自由黨到底能否透過定期會面來縮窄與總商會嘅分歧，就要拭目以待。不過，卓妮前日在香港中華文化總會一個慶祝活動上，就遇到今次「總商會事變」中擔任關鍵人物嘅全國政協常委陳永棋，佢透露總商會未來部署：「我哋（總商會）得兩個字，就係『防守』！」莫非棋哥暗示緊佢會採取「敵不動，我不動」防守策略、總商會之爭已暫告一段落？
棋哥對事件不願多談，繼而轉移視線，刻意拉埋同場嘅醫管局主席胡定旭及前民政事務局局長何志平齊齊影張合照：「我哋三肥一齊影張相，千祈唔好叫我哋『三傻』就得嘞！」棋哥攞自己身形嚟開玩笑之餘，仲拉埋肥胡和肥平落水，難得兩人都唔介意，三人仲笑騎騎！
卓妮