本文重點
北京大學光華管理學院嘅ＥＭＢＡ（高級管理人員工商管理碩士）課程今年十周年紀念，早幾日隆重其事搞咗個論壇，討論金融海嘯下中港企業嘅危與機。唔講唔知，ＥＭＢＡ課程喺香港仲搞咗個校友會，而校友會會長正係大家熟悉嘅老牌「體操王子」李寧，當日佢現身說法，吸引咗唔少嘉賓捧場。
已經由運動員轉型做運動服裝品牌老闆嘅李寧都慨嘆，金融海嘯唔多唔少都影響咗佢嘅生意，不過公司一早有晒應變策略，所以業務總算可以正常發展。問到會唔會感到好大壓力、平時點樣抗壓，李寧就自嘲話，可能佢係一個矮人，矮人比較能夠抗壓，而且喺金融海嘯中，活着就是勝利，所以都唔太擔心。
不過依家香港除咗金融海嘯，仲有豬流感橫飛，成日要四圍去嘅李寧一樣好有信心，佢話自己多數都係中港兩邊走，兩地嘅疫情都未算太嚴重，總之跟足衞生指引做就得啦！
啟剛話無裝探測器
無論由運動員到生意人，李寧嘅魅力都無遠弗屆，連霍英東家族第三代接班人霍啟剛都被佢吸引而嚟。啟剛話自己都好想讀呢個課程，不過七個精英中都只係收一個，佢謙稱唔知有無機會喎。
早排啟剛嘅爸爸霍震霆架白色法拉利，畀卓妮發現裝咗個雷達探測器，可以偵測到警察捉快車嘅雷射槍，霍震霆聲稱唔知係邊個安裝，卓妮問啟剛係咪佢裝上去，佢否認之後就即刻閃人，唔知邊個係黑手呢？
卓妮