總商會理事會早前改選，自由黨前主席田北俊以低票當選，身為自由黨友嘅楊國琦亦角逐連任副主席失敗，田少支持嘅兩位新丁同樣入唔到理事會，事後田少就歸咎於自由黨「中間偏右」嘅方針，話可能該黨依家多咗上街，走嘅路線較為偏向中小企，令大財團有所保留，先至導致今次嘅滑鐵盧事件。
不過，據聞總商會主席包立賢近日就寫咗篇文章，準備透過日內出版嘅商會《每月通訊》，向全體商會成員澄清事件。有睇過篇文章嘅理事話，佢喺文中承認總商會過往同自由黨喺好多議題上都理念一致，經常有合作同關係比較密切，但亦有會員認為總商會唔應該偏埋某個黨派，應該同民建聯、泛民主派等四方八面嘅政團都廣泛接觸，所以總商會今後將透過佢哋喺立法會嘅代表、即係已經退出自由黨嘅「3L」成員林健鋒（Jeffrey），游說各黨派支持總商會嘅工作同建議。
包立賢又反對有人將大企業同中小企分化、對立起來，強調大中小型企業都係該會嘅成員，佢哋對所有成員嘅利益同意見都咁重視。
包立賢嘅講法，明顯係代表總商會力撐Jeffrey，擺明要同自由黨劃清界線。呢篇文章好快會喺總商會六月出版嘅《每月通訊》出街，大家不妨拭目以待喇。