民政事務局前常任秘書長媽打李麗娟早兩日做東，請莎莎老闆郭少明夫婦同奧運馬術公司行政總裁林煥光兩公婆去香港會食晏。媽打話郭少明最近進身馬會遴選委員，當然要賀一賀佢喎。
媽打今次大方請客，除咗恭喜郭少明做馬會遴選委員外，仲趁機多謝對方。話說媽打退休之後積極參加慈善活動，幫唔同機構向富商揼心口籌款，愛滋病基金會、保良局、小母牛計劃同去年嘅奧馬籌款都有參與，郭少明正係支持媽打做善事嘅「大水喉」。媽打話，單係○八北京奧運馬術香港基金，郭少明就捐咗成千萬，所以尋日先會搵埋林煥光食飯敍舊兼道謝。
馬會會員一向係身份象徵，馬會依家大概有一萬二千五百個全費會員，當中只有二百人能夠做遴選委員，其他人要成為馬會會員，必須得到遴選委員推薦同附議，每人一年最多推薦三人。名人圈中，醫管局主席胡定旭、即將退休嘅金管局總裁任志剛同立法會議員林大輝都係遴選委員嘅一分子，所以冇番咁上下都咪使旨意做到遴選委員。