政商界名人好多時以「雀」會友，攻打四方城，廣為人知嘅有全國人大代表馬豪輝、前經濟發展及勞工局局長葉澍堃、貿易發展局總裁林天福、鄉議局主席劉皇發、立法會議員石禮謙及梁君彥等。江湖傳聞話，年前葉澍堃（Stephen）、林天福、梁君彥及林健鋒（Jeffrey）約埋打台灣牌，結果Jeffrey唔聲唔聲食咗鋪海底撈月清一色萬子，其餘三個輸到一仆一碌。
Stephen尋日證實確有其事。佢憶述話，當日大家齊齊去咗廣州，參加長江製衣創辦人兼慈善家陳瑞球一年一度搞嘅荔枝團，大家食完飯得閒無事就打麻雀，不過Stephen點都諗唔到會畀一鋪大牌搞掂咗，佢話打台灣牌好少會做清一色，因為做得牌嚟都畀人食咗胡啦。
但Jeffrey偏偏向難度挑戰，食咗鋪海底撈月清一色萬子，贏咗八十幾番，仲再嚟兩鋪自摸，搞到Stephen都要嘆句「盲拳打死老師傅」！
打牌好講牌運，往往食一鋪大牌就有排旺。Stephen心知不妙，擔心繼續磨爛蓆只會愈輸愈多，好彩呢個時候突然有人嚟打救，佢就係球伯喇。球伯喺午夜點幾二點，叫大家一齊消夜，於是先至冇繼續打落去。早兩個星期球伯捐贈一千八百萬元予科技大學起學生宿舍，Stephen同梁君彥都有出席，果然好畀面佢老人家！