早排政府搞咗個「全城清潔大行動」，班高官揸埋掃把，戴晒手套上街，對住鏡頭又擒高又趴低，好似街頭巷尾都畀佢哋掃乾淨晒咁。查實全港仲有不知幾多衞生黑點，甚至連官地都變咗蛇蟲鼠蟻嘅「鐵竇」。
呢嗱，將軍澳坑口半見村村口有幅官地，懷疑兩年前畀人非法佔用做回收場，有水有電，加埋個大帳篷，周圍都係裝滿廢紙、廢鐵嘅大鐵籠，仲有大量雜物，規模相當可觀。最弊係廢品惹嚟大量蛇蟲鼠蟻，附近居民畀啲「鄰居」搞到不得安寧，健康更受到嚴重威脅。
佔用官地已屬違法，仲影響埋環境衞生添，附近居民投訴過好多次，食環署同地政總署互相踢波鬥唔理，跟手又話條路歸路政署管，卒之冇咗件事。後來地政總署求其起條欄杆就當做咗嘢，但一啲作用都冇，回收場啲廢物照樣出出入入。
搞成咁，好明顯係因為政府部門互相卸責啦。本報記者分別向民政事務總署、地政總署、警務處、路政署、食環署同環保署六個部門查詢，問吓佢哋有冇做過嘢。講都冇人信，原來佢哋由○七年底到上個月中，已經對回收場採取過六次聯合清理行動喎。
六個部門、六次行動，搞咗近兩年，乜嘢結果都冇，幾時至搞掂吖？冇人答得到；問題點解一直未解決？同樣冇交代。唔通真係「六六無窮」，要一直拖落去？唉，政府部門做嘢有頭威冇尾陣，拖得就拖，預咗啦。人人參與，個個卸責，決策已經慢三拍，有咗決定仲要等齊人至「聯合行動」，等得嚟蚊都瞓啦。
就算採取聯合行動，亦係做騷走過場，效果成疑；而且做完呢場，下一場「大龍鳳」又唔知要等到幾時。違法經營者梗係當政府冇到，呢頭冚完，第二日就即刻開番工啦。
好似本港街道清潔咁，○三年沙士後，政府嘅全城清潔策劃小組提出喺東區、深水埗、油尖旺、九龍城同元朗五區衞生黑點安裝閉路電視監察垃圾蟲，仲計劃推廣至全港十八區。但事隔五年幾，政府竟聲稱，因為後巷「衞生情況理想」，兩年前已經逐漸移走晒所有閉路電視。
點知實情完全唔係政府講嘅「情況理想」，曾經裝過閉路電視嘅後巷已經打回原形，垃圾堆積如山無人清理；污水發出陣陣臭味；簷篷坑渠丟滿食物殘渣。有食環署員工踢爆，人手同資源不足，署方有空缺又唔請人，唔夠人手，惟有主要掃大街，後巷就唔掃住。沙士期間，唔少區都有兩架水車供水洗街，但依家大部分地區只得一架。班官員淨係掛住做門面工夫，唔怪得香港愈來愈污糟啦。
有立法會議員批評政府「踢一踢、郁一郁」，咁多部門搞咗近兩年，連一個非法回收場都搞唔掂，簡直係「無能」！計功夫茶話齋，煲呔曾當年做過「清潔大隊長」，家陣又有唐唐呢個「管樹大隊長」，不如快啲搵番個高官做「蛇蟲鼠蟻大隊長」啦。