金融海嘯下好多公司都話要裁員減薪，以保持競爭力，但「白花油王子」顏福偉（福仔）就認為，要搞好同員工嘅關係，先至保持到產品水準和企業形象，所以佢間公司無裁員計劃，希望保持員工士氣，正因為咁，白花油藥廠生意無影響不特止，較去年仲有所增長。福仔話，做生意最緊要有良心，搞好個形象，啲錢就會湧埋嚟㗎喇！
維多利亞青年商會尋日請咗福仔出席研討會，主講企業形象及品牌建立，福仔除咗賣花讚花香外，仲提到自己經常外出旅行，期間留意到不同地方嘅人對使用藥油嘅習慣都有所不同，好似美國人乜都要大，大樽裝藥油就最好賣，反而菲律賓人就鍾意細支裝，於是特別出產一點五毫克裝白花油，全世界只係得菲律賓有得賣，原來賣藥油都有咁多學問嘅。
近期「小甜甜」龔如心爭產案熱爆全城，好多人都話福仔同爭產主角陳振聰樣貌好相似，甚至建議開拍電影搵福仔擔大旗做主角。福仔就話對拍戲無乜興趣，又話自己唔鍾意在水銀燈下生活，但如果有人出大筆錢請佢拍戲做善事，佢都會考慮吓喎，拍完之後捐晒啲錢出嚟。至於幾多錢至請得郁佢，佢就無講喇！