政情:發叔上京學風水

自從「小甜甜」龔如心千億遺產爭奪戰揭幕後,發現原來風水條財路無邊無際,點會諗到燒銀紙可以改運吖!不過,信風水千祈唔好沉迷,好似鄉議局主席劉皇發信風水就信得非常理智,神棍搵食都要行遠啲,例如鄉議局在沙田石門興建新大樓,邀請風水師到場燒陰契及擇日動土,目的只係祈求開工大吉,日後風調雨順,政通人和。

新界鄉村好講風水,好多原居民申建丁屋或發展商起樓,經常有村民話破壞風水而反對,所以各鄉村在去年底劃出風水地圖作為依據,費事口同鼻拗。發叔貴為新界地王,若然發展土地時畀鄉民話破壞風水,最終點樣解決呢?發叔諗咗一陣話,風水唔係人哋講乜就信乜嘅,要經過仔細分析,諗吓有無道理,無道理嘅自然要據理力爭。

正因為要分析風水意見,發叔話計劃上北京搵個風水大師學風水,增加個人風水知識。至於睇中邊個高人,佢就話仲未諗掂,一切有待安排喎。

直擊人類豬流感最新疫情
詳情瀏覽on.cc《奪命流感》