教育局計劃六月前就中學語言微調方案作最後定稿，等教育界調整彈性教學師資、課室等，以便明年九月正式推行微調政策。不過，語常會主席田北辰近日頻頻出招狙擊，加上教育界前線職員都要求暫緩推行，搞到教育局局長孫明揚臨門一腳都遇到唔少阻滯。
田二少攔截孫公既花心機又花錢，日前自揼心口搵大學幫手做家長對微調方案嘅調查，之後又開記者會，又約見孫公，要求政府暫緩一年實施微調方案，可惜孫公畀檸檬佢食，講咗句：「多謝你嘅好意！」仲話微調方案勢在必行。
一招不果，二少尋日又寫咗篇《香港家書》，批評微調政策話等於令香港教育界重返上世紀八、九十年代放任型「校本自決」模式，再次實行啲非驢非馬嘅「港式英語教學」，令下一代「英不成、中不就」，仲話唔明白點解香港有短路唔行要行長路，步美國波士頓推行英語及拉丁語教學失敗之路。田二少仲有知音客，事關前線教師都擔心落實微調方案後，現有教師人手難以應付雙語教育嘅挑戰，佢哋亦要求當局暫緩執行。至於田二少今次嘅狙擊成唔成功，就要睇落去至知喇！