自由黨前主席田北俊早幾日喺香港總商會理事會換屆時以低票當選，黨友楊國琦更失掉副主席一位。田少事後話可能總商會中嘅大財團對自由黨依家嘅「中間偏右」路線有微言，覺得自由黨只幫中小企，成日上街示威，罵業主加租、銀行無良，希望該黨喺中小企同大財團之間取得平衡。
尋日自由黨黃錦超嘅區議員辦事處開幕，田少、現任主席劉健儀（Miriam）、副主席方剛同張宇人都拉大隊撐場。
問Miriam點睇田少今次低票當選？佢直言直話，指田少「當選如何，同自由黨無直接關係，今次選舉自由黨無參與」。問到自由黨喺總商會係咪失勢時，Miriam就話，自己過去都唔係成日去商會，即使去都係以個人身份去。至於擔唔擔心田少嘅言論會造成路線之爭，Miriam就似乎唔係好同意田少嘅睇法，佢話田少有自己嘅睇法，不過自由黨「中間偏右」嘅路線不變，希望代表包括大、中、小企嘅商界，不過會檢討表達手法，睇吓可以點改善，又會與各商會定期會面。
方剛似乎亦企埋Miriam嗰邊，佢話自由黨係對事，如果業主加租加得太離譜，銀行唔放錢影響中小企生存，就梗係要出聲啦，絕對唔影響黨路線咁話。睇嚟自由黨對未來何去何從，都要喺內部凝聚共識至得！