本文重點
立法會兩個月後放暑假，係時候總結吓班議員嘅表現，最常用嘅指標就係佢哋喺每個星期三舉行嘅立法會大會上，提咗幾多條質詢同幾多次動議。計埋今個月嚟緊嗰兩次大會，有四位議員不約而同提咗十七條質詢，當中包括每年都爭做「質詢王」爭咗十幾年嘅民協馮檢基同民建聯劉江華，另外兩位挑戰者就有啲出人意表，兩人都係新丁議員，佢哋就係陳克勤同Starry李慧琼。
並列第二位同樣提咗十六條質詢嘅，亦咁啱得咁橋有四位，包括平日比較低調嘅衞生服務界李國麟同鄉議局副主席張學明，真係估佢哋唔到。其餘兩人亦同為新丁議員，包括民主黨甘乃威同旅遊界阿Paul謝偉俊，後者同李國麟更加係提質詢最多嘅前十位議員當中，僅有嘅兩名功能組別議員。
睇番呢四名新丁質詢王嘅問題內容，阿Paul嘅提問大部分都同佢嘅業界有關，而且佢由十二月開始先問第一條問題，但後勁相當凌厲。Starry嘅提問大多集中於經濟同樓宇管理，但亦問咗兩條有關援交少女同保護兒童嘅問題，唔知係咪同佢身為母親有關。甘乃威嘅提問就地區性得多，好多都圍繞佢所屬嘅港島區，最出位係問咗條有關六四教科書嘅問題。克勤仔嘅提問就集中於環保、房屋同公共衞生，但暫時未有邊條稱得上做代表作。
金勞詹IQ博士零提問
讚完啲最勤力提問嘅議員，又係時候要彈吓啲立會大懶蟲。金融服務界詹培忠同中總黃宜弘再次錄得零質詢，體育界霍震霆、工總梁君彥同資訊科技界譚偉豪亦只問過一條問題，似乎對唔住啲納稅人同選民。
喺動議及休會辯論方面，暫時提過最多三次動議嘅兩位議員都係黨主席，佢哋分別係自由黨嘅劉健儀同民主黨嘅何俊仁，不過前者有一次係以內會主席身份、代表整個立法會提出嘅施政報告致謝動議。有九名議員至今都未申請過提出任何動議，其中八位都係來自功能組別，只有工聯會黃國健來自直選，KK好快啲做番啲嘢喇！