中環出更:任總夫婦糖黐豆浪漫中環

有人話離職前嘅心情特別輕鬆愉快,這一點完全反映在金管局總裁任志剛身上。當政府宣布任總於十月一日離任後,任總猶如脫籠之鵠,在上周四最後一次出席立法會財經事務委員會時,回應議員質詢收放自如,而上周五出席雷曼小組聆訊,面對連串批評均視作等閒,兩日散會後都拖埋太太葉小慧去拍拖食飯兼行街,仲風騷到離遠同卓妮揮手添!

退休安排保持神秘

任總上周四(廿一日)出席立法會會議後,卓妮就見佢約埋太太葉小慧去香港會食午飯,心情靚靚,笑容可掬,與身旁太太嘅笑容相當一致,但講到退休後有乜安排,佢就繼續保持神秘。到咗翌日(廿二日)早上出席雷曼小組聆訊,雖然任總被議員批評包庇銀行,又被公眾席上嘅雷曼苦主高聲責罵,但無礙佢嘅輕鬆心情,傍晚六點半放工時間,又拖住太太到金管局大本營樓下嘅IFC商場一齊逛公司。

任總夫婦在IFC行街行到如癡如醉,完全無發覺卓妮存在,直至登上扶手電梯時,任總才離遠望到卓妮,於是好得戚指畀太太睇卓妮嘅所在位置,仲好大方揮手向卓妮Say Hi!打招呼之後,佢哋繼續到上層行街。任總近排每逢出席立法會雷曼小組聆訊,都有大批警員及便衣探員暗中保護,但前日就未見有探員跟住任總夫婦行街,可能諗住IFC無危險啩!

CY話星洲檢疫鬆懈

任總嘅離開已成定局,但盛傳為佢接班人嘅特首辦主任陳德霖就是非不斷,近日仲爆出政府黑箱作業,早已決定攞命陳為任總接班人,連立法會議員都畀佢玩到陀陀擰。十大傑出青年選舉提名期話咁快又開始,行政會議召集人梁振英(CY)擔任首席評判,被問到任總接班人只得一人,係咪反映香港冇人才?CY話,在香港或國際間,適合擔任金管局總裁嘅人唔多,目前大家討論緊嘅只得陳德霖係咪合適做接班人,佢相信遴選委員會會選出合適人選。

豬流感陰霾揮之不去,各地關卡都提高警覺嚴防惡菌突襲,但CY日前去完新加坡公幹後嚇咗一跳,事關佢見到星洲檢疫較香港寬鬆,入境旅客毋須填寫境內行程、地址同聯絡電話,擔心機上一旦有人確診患上豬流感,亦無從追查喎。為求自保,CY坐飛機時點都會戴番個口罩,佢又叫身在英國讀書嘅仔女切勿與朋輩攬頭攬頸,避免感染疫症。

直擊人類豬流感最新疫情
詳情瀏覽on.cc《奪命流感》