政府快將公布俗稱「皇榜」嘅公務員升職名單。近廿人嘅升遷名單中，○六年中調派空降港台出任副廣播處處長嘅傅小慧，兩個月前調任發展局副秘書長，職級係署理首長級第四級（D4），據聞，即將公布嘅皇榜中，傅小慧將會紮職，坐正D4位，總算守得雲開見月明。
傅小慧空降入爛透嘅港台，係人都知呢個係三煞位，裏外不是人，吃力不討好，不過，傅小姐福大命大，大步檻過，其後前廣播處處長朱培慶爆出攬女醜聞，被迫提早退休，傅小姐更加要捱義氣，頂埋老細份工，署理首長級第四級，直至去年《獅子山下》前監製黃華麒接任處長，傅小姐先至平調發展局，負責規劃同地政工作，捱咗咁耐，終於有機會坐正D4位。
今次皇榜嘅另一個焦點係煲呔曾嘅「愛將」朱曼鈴，半年前，朱小姐由運輸及房屋局副常秘，平調做民政事務局副常秘，一腳踢主理西九文化區嘅規劃同埋文化區管理局嘅架構同請人事宜，據聞佢今次獲破格待遇，未曾署理過D4，就可直升坐D4位，情況極之少見，唔知同佢係煲呔曾「愛將」有冇關係呢？