30+三連發安東尼射爆湖人

本文重點

正當大批球迷都期待緊占士決戰高比之際,「小甜瓜」安東尼誓要阻止呢個對碰誕生,尋日佢個人攻入34分及9個籃板球,帶領金塊喺西岸決賽第二回合贏湖人106比103,總場數追成1比1平手,明日將於丹佛舉行第三戰。(高清翡翠台、now 670及廣東體育周日早上8時30分直播)

湖人Game1僥倖保存勝局,但今場就輪到佢哋「不幸」,皆因球隊於第二節一度領先金塊14分之多,可惜完半場前竟被金塊打出一波10比0攻勢,追貼至只有一分之差。第三節開賽後,湖人憑阿利沙連入六分再度拉開距離,但安東尼挺身而出連入多個重要罰球,助金塊再一次追貼分數,並於第四節反先對手。

當比賽剩餘4.3秒時,湖人落後三分,可惜費沙最後一擊「射空氣」,最終金塊險勝106比103,教練卡爾自從接手球隊後,首次作客洛杉磯贏湖人。

費沙浪射致命

安東尼射入全場最高34分及9個籃板球,而隊友比立斯就有27分進帳,同屬贏波功臣,而「小甜瓜」已連續三場季後賽射入「30+」得分,係金塊三十二年歷史上,唯一一人做出此成績。雖然湖人輸波,但高比拜仁依然交出可人表現,個人攻入32分及5個籃板球,而加素則貢獻17分及17個籃板球,可惜費沙表現太差,全場9射1中得3分,成為致命敗因。

金塊明早將於主場出戰第三回合,以球隊連續兩場作客都逼到湖人咁緊,相信返到主場表現會更勁,金塊讓4分照捧上盤。