政情：尹德勝揭李秀恆發火之謎

李秀恆一向溫文，尋日突然踩政府，連廠商會行政總裁梁世華都有啲突然，幫李秀恆補飛話，其實會所嘅轉地契手續，政府已經批咗，只係廠商會自己未拍板係咪落實計劃啫，兩個人各有各講，撲朔迷離。我哋去問尹德勝，先至真相大白。

尹會長話，去年有會董建議，喺廠商會大廈廿六樓搞間會所，做大家聚腳、款客嘅竇口，本來主意唔錯，轉地契手續都搞妥，之但係，金融海嘯遽然殺到，搞食肆風險大，所以咪叫停先囉。用尹會長嘅話說：「講句老實話，呢鋪真係唔關政府事！」咁點解李副會長又會咁好火呢？尹會長話，可能同李秀恆喺農圃飯店有股份有關啦。

哦，係喎，搞食肆，政府規限多多，消防、衞生乜都跟足程序，做老闆嘅係勞氣啲㗎嘞。