港府物色咗西九文化區管理局行政總監相當一段時間，聽講終於敲定人選，由曾經做過迪士尼工程師嘅前地鐵管理層鄭肇川出任。洋名「Angus」嘅準西九行政總監唔係太多人認識，本身亦唔係文化界人士，好多人聽見呢位無咩文化藝術背景嘅人做西九「二哥」，都話擔心西九會變成空有幾座大型建築物嘅大白象。
鄭肇川早年參與過發展法國迪士尼樂園，後來做埋香港迪士尼幻想工程師，近年加入前地鐵公司做總經理，主力做物業投資，最近一份工就係投資銀行。睇住呢份履歷，又好難怪文化界憂慮，質疑一個毫無文化背景嘅人，點樣去構建一個文化區？不過亦有人話，鄭肇川有豐富發展大型項目經驗，將來要靠佢同政府交手，管理局亦唔係由行政總監玩晒，將來有行政總裁揸主意，所以唔使太擔心喎，認真係各有各睇！
其實西九行政總監呢個位絕對係高薪厚職，年薪超過一百五十萬元，任期兩年，主要係協助西九管理局前期督導規劃發展工作，處理日常運作。
不過西九管理局發言人尋日唔肯證實具體人選，只係話招聘程序接近完成，獲選者年中上任，當局會喺適當時候公布。