立法會議員陳克勤不時西裝骨骨打晒呔，打扮似足返中環嘅金融才俊，克勤仔可能對自我形象信心十足，尋日現身立法會時大派印有自己嘜頭嘅新卡片，卡片設計似足補習天王，克勤仔將自己個樣放盡成張卡片，睇落個頭仲大過「陳克勤」三個字，好明顯係Sell樣多過Sell名氣。克勤仔否認咁做係想吸引更多女粉絲，只係話以前嘅卡片只寫名冇相片，依家既然做咗直選議員，要等多啲人識佢，咪印番二千張派街坊，認真揼本。
克勤仔派完卡片，又攞樽好似一罐汽水咁大嘅黃色液體出嚟，大家以為攞樽尿開玩笑，原來佢話今日準備做例行身體檢查，要驗尿，不過佢樽黃色液體唔係尿，而係生化環保柴油。佢話下周一要開嘅環境事務委員會議將討論生化柴油，主席余若薇有事唔能夠主持會議，由佢初擔大旗做代主席，所以尋日佢約咗個油商傾偈，順便攞樽油返去研究。
佢仲變身柴油專家，硬銷用生化柴油夠晒環保，只係價錢略貴，又要左溝右溝，所以四大油商先至一直冇採用喎。佢打算建議部分政府車輛帶頭使用呢種柴油，成唔成事，就要睇佢牙力喇！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
