本文重點
由富豪名人年輕一代組成嘅菁英會上周一舉行換屆選舉，城中數位公子分別以高票連任，霍英東家族第三代接班人霍啟剛以第一高票一百八十二票連任副主席，施榮忻亦以一百八十票連任做主席，新世界發展執董鄭志剛、信和主席黃志祥公子黃永光、全國政協委員盧文端公子盧金榮等人就冧莊做副主席，全國政協常委楊孫西公子楊華勇成為唯一新當選嘅副主席。至於莊氏集團太子爺莊家彬都唔執蝕，連任做秘書長。
冧莊成功嘅施榮忻話，嚟緊下半年將同博鰲亞洲論壇合作，首次喺香港舉辦「博鰲青年論壇」，認真係唔得閒！
施榮忻明年唔冧莊
全國青聯副主席明年換屆，現任全國青聯副主席曾智雄及黃英豪將退下火線，騰出兩個空位，卓妮八到，其中一個位多數由香港青聯主席接棒，另一個位花落誰家，目前仍未明朗，所以分分鐘爭崩頭。到底施榮忻係咪有意角逐呢？佢話唔想評論，目前只想湊大菁英會；新主席任期只有一年，到明年六月底就完結，施榮忻表明唔再冧莊，屆時會交棒畀其他人。
講開菁英會，嚟緊動作多多，六月中將聯同八大社團包括由「褲王」楊釗擔大旗嘅香港各界文化促進會、廣東社團、福建社團、百仁基金等團體，喺中環大會堂舉行圖片展，到時場面肯定好墟冚！
卓妮