本文重點
立法會經濟發展及環境事務委員會訪粵團周一下午兩點幾安全返抵立法會大樓，正當呢班鴨仔議員落車期間，突然聽到遠處發出震撼嘅跑車引擎聲，令卓妮精神為之一振，事關自由黨兩位直選議員落選後，好耐都無喺立法會停車場聽過跑車聲嘞，八卦上前一看，原來係港協暨奧委會會長霍震霆，正準備開走部白色法拉利。
屬貴價美國貨
小霍呢部法拉利456GT於九四年出廠，至今已有十五年車齡，汽缸容量達5500cc，車牌亦只係用番舊牌「AF21」。舊車舊牌看來無乜特別，但細心觀察，發現車頭擋風玻璃上裝咗雷達探測器，仲係幾千元貴價美國貨。呢部機特別設有後方雷達感應，能夠測到警方捉超速嘅雷射槍或白鴿籠，總之乜嘢騎呢位都會預早響號提示司機減速。
卓妮印象中，自由黨田北俊和周梁淑怡手車都有番咁上下，但都無安裝雷達探測器，點解小霍要安裝呢？莫非小霍手車仲辣？抑或因為部法拉利快得滯容易誤中雷射槍呢？定係想知道警方擺位影快相有幾勤力呢？可惜卓妮尋日搵唔到小霍介紹吓部探測器，所以未知佢裝嚟有乜用途。
講番立法會個訪粵團，小霍並非經濟發展及環境事務兩個委員會嘅成員，加上佢稱得上係珠三角字典，所以無跟大隊上去考察，但估唔到連班鴨仔議員返港都前後腳緣慳一面，當日小霍同卓妮傾咗兩句後就隨即絕塵而去。
卓妮