本文重點
「得西九，得天下」定係「得西九，得罪全天下」？西九計劃擾攘多年，上年中終於得立法會首肯撥款，以為從此順風順水，閂埋門密密做，原來暗湧一樣風高浪急，西九前路唔易行。二十面體行政總裁胡恩威尋日喺電台節目發炮，狠批政府搞掂西九文化區大計之後，就當文化藝術界係豬流感帶菌者，生人勿近，極少接觸，簡直係過橋抽板咁話。對胡恩威呢番話，就連西九管理局諮詢委員會成員黃英琦亦大表贊同，指港府打完齋唔要和尚。
西九文化區管理局，依家為西九做緊規劃同請人工作，以為收編民主派嘅單仲偕入局，做薪酬委員會主席，掩住泛民把口，就可以耳根清淨啲，睇嚟港府打錯算盤，港府真正需要收編嘅，應該係幾位「文化界長毛」至啱，一日未做得到，西九文化區都只會喺囂鬧聲中上路。
身兼西九龍民間評審聯席成員嘅胡恩威，尋日喺大氣電波聲討西九管理局，唔需要講文化，盡情大罵，彈到管理局一文不值，其中一樣，正正就係質問港府，單仲偕對文化藝術認識有幾多，憑乜嘢坐呢個位先？然後再批西九執行大員、民政事務局副秘書長朱曼鈴，鬧朱小姐為官高高在上，唔同業界溝通。
撥款到手 懶理業界
胡恩威鬧足成粒鐘，直頭停唔到口，鬧到高興，直指港府卑鄙，西九大計要社會支持，就要同文化藝術界傾，但係自從上年中得立法會撥款二百幾億放行之後，就影都唔見，過橋抽板！嘩，呢個指控等如指港府忘恩負義，性質嚴重，港府聽到被人鬧係負心漢，唔知有乜反應？
同胡恩威出席同一個電台節目嘅黃英琦，亦加入戰陣，踩埋西九管理局一份，透露西九管理局諮詢委員會五月廿七日先至開第一次會，即係佢做咗成員兩個幾月，仲未開過一次會，佢都曾經諗過，「如果我做唔到嘢，不如唔做嘞」咁話，同胡恩威一唱一和，寸盡管理局。
其實港府都知胡恩威難纏，當年西九推倒重來，大鑼大鼓成立核心文化藝術設施諮詢委員會同轄下三個小組時，就委任胡恩威入表演藝術小組，最近又搵佢入經濟機遇委員會，點知都封唔到佢把口。西九嘅總發展規劃圖則，就快展開公眾諮詢，如果港府搞唔掂班文化界人士，睇嚟仲有排煩，雖然二百一十六億元撥款已經到手，斷估西九大計唔係學當年推倒重來啫，不過，畀人由朝鬧到晚，都咪話唔頭痕。
騷人墨客多牢騷，有高官話，大型文化活動一定唔可以由文化藝術界人士管，睇嚟係啱！