政情：林淑儀揸鑊鏟得「天下」
進出口界立法會議員黃定光（象哥）嘅老婆林淑儀，啱啱成為新一屆工聯會會長，佢對勞工問題向來表現出一副強悍嘅戰鬥格，但尋日同傳媒聚會時就展露出嬌柔嘅一面。有人問林淑儀同象哥相識嘅經過同浪漫史，佢就即時臉紅紅，好嬌柔咁猛叫大家唔好問喎，但當然係失敗啦！
林淑儀透露，同象哥係八十年代喺工會活動認識，象哥當時係商會青年委員會成員，佢就自然係代表工聯會啦，兩個一撻即着，最終締結良緣。林淑儀又話，雖然自己代表工會，象哥代表資方，但永無鬧交：「我負責煮飯嘅，你話邊個話事吖！」象哥就好瀟灑話：「呵呵，老婆話乜咪乜囉！」明晒。
工聯會新會長新作風，佢哋未來會搞手機程式，又話會加強內地服務中心嘅服務，其中最主要服務嘅對象就係「雙非」嬰兒，因為佢哋係香港人，相信將來唔少人會搵佢哋幫手咁話喎。