可惜，世事無絕對，人哋嘅鵝可以生金蛋，而政府嘅鵝唔單止一粒金蛋都屙唔出，仲養到瘦蜢蜢甚至餓死添。好似話紅磡大環山公眾泳池餐廳咁吖，喺○四年因為生意唔好要停業，康文署試過先後五度招標，都搵唔到合適嘅投標者，最後招標程序喺○八年終止，目前吉咗喺度養緊蚊。小數怕長計，呢間舖位空置咗咁多年，政府都唔知損失咗幾多租金收入。
其實，連附近嘅街坊都話嗰度唔係話冇生意做，大環山泳池周不時有泳會搞比賽，平日亦有唔少人去游水，唔做餐廳都可以經營其他生意吖，例如將側門打通過去海濱長廊，整間咖啡茶座夠好啦。如果咁都吸引唔到投標者嘅話，咪諗吓辦法整多啲配套，增加吓競爭力囉，再唔係，索性減租留住啲商戶囉。
有時真係諗爆頭都諗唔明，人哋一間小小舖頭都可以做到風生水起，點解啲物業一落到政府手中，唔係冇人租，就係拍烏蠅呢？
話時話，如果淨係大環山公眾泳池餐廳冇人租，咁都唔係好大件事，最弊呢個只係冰山一角。據資料顯示，康文署轄下十五個公眾泳池有餐廳，其中六間已丟空咗好耐，即係四成泳池餐廳冇人租，你話呢條數幾襟計吖。呢啲泳池餐廳唔係凶宅，又唔係位於山旮旯地方，因乜事一直租唔出？一字咁淺，就係因為官「懶」咯！
依家失業率飆升，搵食艱難，你估冇人想去投間泳池餐廳嚟做咩。有曾經試過去競投嘅市民話，康文署限制多多，枱布唔換得，想話加啲卡通人物改做主題餐廳又唔得，最搞笑嘅係，泳池閂門，餐廳一樣要跟住閂門。俗語有話，殺頭嘅生意有人做，蝕本生意搵鬼做咩！
康文署訂落嘅限制要幾多有幾多，擺明唔想租出去。咁又係嘅，多一事不如少一事，泳池餐廳關門大吉仲好，浪費納稅人資源關人個關，最緊要懶到出汁嘅官老爺唔使做，日日印印腳等收工，咁就最Happy啦！
講起真係成肚火，政府呢頭呻窮，嗰頭就洗腳唔抹腳，有租金都懶得收，要數呢啲敗家嘢，十日都數唔晒。呢嗱，喺正黃金地段嘅私人停車場，就算多多位都泊滿，奇在好多政府停車場居然拍晒烏蠅。鬼咩，成班官員食古不化，企硬唔減價，又冇彈性收費模式，搵鬼泊啦！
仲有吖，食環署轄下好多公眾街市明明位於黃金地段，但唔知點解永遠十室九空，班懶官仲好意思賴係超市競爭激烈所致！喂，唔好擘大眼講大話啦，公眾街市虧損關乜對手太強事吖，係食環署不思進取，懶得改善就真！
冇法子啦，呢啲係公帑嚟之嘛，浪費幾多都唔關佢哋事，又點會覺得肉赤吖。換轉呢啲攤檔係官員嘅私人物業，佢哋又點會咁嫌錢腥吖，收少一日租，賺少一個崩都唔肯過你呀！
功夫茶敢寫包單，如果政府係一間私營公司，執硬都得啦！