泰國總理阿披實昨日旋風式訪問香港，今日就離開。佢話自己只喺香港逗留十一個鐘左右，但香港係佢喺四月泰國紅衫軍示威後，第一個出訪嘅地方，都算十分畀面香港。
阿披實知道早前泰國示威嚇親香港人，佢昨日出席貿易發展局午餐會時話，佢今次嚟香港嘅目的，係話畀香港人特別係商界知，泰國已經回復正常，曼谷市面秩序好好，叫港人可以放心去旅行同做生意。呢位推銷員仲話，泰國政府除咗發展旅遊業，亦都會發展高增值嘅醫療旅遊服務添。
阿披實在政界出名後生兼靚仔，有好多女粉絲，被人叫做「女人湯圓」，但原來佢唔係咁鍾意呢個稱呼，佢話被人咁叫，覺得好失望，又話做咗五個月總理，已經令佢老咗好多。
堂堂一國總理駕到，接待阿披實嘅貿易發展局，主席蘇澤光就咁啱去咗康城影展，貿發局出動咗前主席馮國經接待佢，有份同阿披實食晏嘅，仲有渣打銀行ＣＥＯ洪丕正、政務司司長個細佬唐慶年、家鄉喺泰國嘅前全國人大代表陳有慶同立法會議員方剛等，都算係星光熠熠嘅。
阿披實喺香港都見過有關官員，傾傾泰國同香港之間建立引渡條例同貿易問題。