有教育界人士發現通識教育嘅課本，問題同答案都有啲問題，有啲課題劈頭就講性衝動，搞到啲教師頭都痕。尋日咁啱遇到教育局常任秘書長黃鴻超，即刻捉住問佢有啲通識教育課本內容有爭議性喎，仲講性衝動添，點睇先？唔知係咪本能反應，佢第一時間就話通識係好嘢，但其他人嘅意見就無謂評論嘞！
黃鴻超擺到明係避重就輕，根本就唔想答，佢將話題一轉，話通識對學生好有用，尤其依家好多資訊都要經常更新，通識科最重要係學生吸收多啲唔同嘅資訊。
不過，高官細個時讀書都冇通識呢科啦，政務官咪統統都識，依家為乜一定要搞呢科？黃鴻超話佢哋嗰時資訊冇咁發達，又冇互聯網，資訊唔使跟得咁快喎。雖然係事實，但佢講到好無奈咁喎！
既然有啲課本講性衝動，打蛇隨棍上問追女仔係咪都可以成為通識教育課本嘅課題？黃鴻超招架不住，竟然將問題推畀啱啱喺佢身邊嘅下屬、教育局副秘書長黃偉綸，話「你問佢啦」。可能通識係一個好新嘅課題，政府高官都要用新腦袋去迎戰啩。