豬流感玩轉香港，有份揸旗統籌維景酒店隔離安排嘅食物及衞生局常秘李淑儀，連日來忙到黑眼圈都出埋，前日終於忙裏偷閒出席工業總會舉辦嘅香港Ｑ嘜頒獎禮，李淑儀對喺現場展出嘅「沙煲罌罉」好有興趣，對於瓦煲嗰個「大肚腩」仲特別有研究。
李淑儀出席完頒獎活動後順便巡吓會場，睇見一個賣不銹鋼煲嘅攤位顯得好興奮，似乎有意買番個煲嚟用，不過李淑儀對買煲嘅考慮非常獨特，佢一嚟就追問售貨員到底不銹鋼煲同瓦煲有乜分別，售貨員哥哥都畀佢考起，擰晒頭話唔知道。
李淑儀咁緊張研究個煲，皆因佢係煲湯專家，一直堅持用傳統瓦煲煲湯，佢以一派專家口脗話，瓦煲設計係下闊上窄，猶如一個大肚腩，當蒸氣上升時，熱氣會沿着煲身嘅弧形而上喺煲內打轉，唔會咁快蒸乾晒，令煲湯冇咁易乾水，火路特別足，言下之意，佢肯定係成日煲老火湯畀自己補身。
問佢最近煲乜湯水抗流感好，李淑儀就話，呢排為咗抗疫忙到瞓覺都無時間，仲邊有時間煲靚湯喎，認真陰功。