電影《葉問》上映後掀起一陣詠春熱，來自世界各地共六百多名詠春學生，尋日齊集香港成立世界詠春聯會及香港詠春聯會，一代宗師葉問嘅長子葉準都畀面出席，八十五歲嘅葉師傅大爆近日收學生收到手軟，坦言教拳數十年來只曾擔心收生不足，從未拒收學生，估唔到《葉問》效應下拜師學藝者太多，令佢要忍痛請學生食檸檬。
葉準師傅尋日聯同得意弟子兼葉問電影出品人冼國林現身，咪睇葉師傅已經八十幾歲，一星期七日仲堅持教拳，佢話電影令沉寂多時嘅詠春再度翻生，學生至少多咗六、七成，幾乎逼爆佢間拳館，縱使有學生誠心誠意斟茶拜師，都冇地方收留喎。
紀律部隊中都有唔少功夫迷，海關關長袁銘輝笑言唔識詠春，但讀書時曾學過「蔡李佛拳」，都算食過吓夜粥。助理關長譚耀強就唔同嘞，跟隨冼國林師傅學詠春八年，練得一身好武功。同場仲有自由黨副主席張宇人，原來佢年輕時曾學過太極，耍得一招半式，但講到學詠春，佢話自己收晒火，無謂臨老學人耍功夫喎。