本文重點
立法會珠三角經濟發展及環境事務考察團，廿五名「團友」有廿一人尋日在內務委員會會議後浩浩蕩蕩出發，展開為期四日三夜珠三角訪問，五名無回鄉卡議員在有關方面安排下順利過關。考察團會分別於深圳、廣州及珠海三地各住一晚，當中以尋晚入住嘅深圳東部華僑城茵特拉根酒店最豪華，平均二千蚊一晚，佔咗三成團費有多，認真奢侈，但佢哋今、明兩晚就愈住愈平。
深圳東部華僑城茵特拉根酒店係以瑞士文化為主題嘅超豪華五星級酒店，坐落於東部華僑城茵特拉根小鎮，湖泊秀麗，樹林茂密，入面嘅雲海谷高球場更為中港兩地富豪嘅傾生意同消閒嘅聚腳點。
茵特拉根酒店房間由一千八百元至四千元不等，在內地稱得上豪華級酒店，點解立法會訪粵團咁識歎揀啱呢間酒店呢？究竟係立法會安排，抑或係內地方面安排呢？有關方面解釋純粹因為咁啱首站參觀鹽田港，然後去東部華僑城比較順路。不過，訪粵團參觀鹽田港只係路過，佢哋坐喺旅遊巴上遠眺貨櫃碼頭運作，望兩眼就鬆人趕去東部華僑城。
升級住湖景房
原本立法會安排訪粵團入住同一等級、一千八百元嘅豪華房，大部分議員提升至每晚二千一百元嘅豪華湖景房，可以欣賞小鎮湖景。立法會秘書處話，通常外訪住三晚酒店，一般總數唔超過三千元就可以。
訪粵團嘅住房可謂愈住愈平，佢哋今晚到廣州入住嘅東方賓館，只係五百多元一晚，而明日入住嘅珠海度假村酒店仲平到三百多元一晚，加埋只係八百多元，結果上、中、下三種價錢嘅酒店，議員都會親身體驗。
議員們可能係互相監察，都算勤力，尋晚酒店原定安排班議員欣賞民族表演，但班議員寧願改為與內地港商座談會，據講部分港商係專程由香港上去參加座談會。
隨團嘅議員梁君彥話，間中都會到東部華僑城雲海谷打高球，呢個場依山而建，要好好波先至打得掂，但由於咁多次打波都係即日來回，所以未入住過茵特拉根酒店，又話人哋用四十幾億投資興建咁有特色嘅小鎮，一千八百元房租一啲都唔貴喎！不過，呢個高球場地勢險要，有部分體胖嘅商家坦言擒高擒低靠腰力，靠腳力，打到索晒氣。