當今官場，行政會議召集人「CY」梁振英最忙，呢位疑似特首候選人，由環保到豬流感到經濟衰退，佢都有嘢講，而最閒嗰個相信就係前商務及經濟發展局局長馬時亨嘞，佢上年八月因腦瘤辭官，一直做閒雲野鶴，優哉游哉過日子。疑似特首碰上前高官，會有乜嘢化學作用呢？咪製造笑聲一大籮囉。
尋晚尖沙咀美麗華酒店有籌款晚會，卓妮貢咗去湊熱鬧，遇上唔少政界人士朋友，CY同肥亨就係其中兩個。CY有意喺二○一二年落場選特首嘅心意呼之欲出，最近任何曝光機會佢都唔放過，尋晚佢連棟篤笑都撈埋，拍住肥亨，一齊為一個籌款晚宴搞氣氛。
兩個人一碰面，CY就開肥亨玩笑，話肥亨休養咗咁耐，都係時候復出啦，唔知係咪暗寸肥亨個腦根本無問題，只係辭職嘅藉口。肥亨把口一向厲害，梗係唔畀CY專美，反唇相譏話：「個個講呢句話都得，你就唔可以，你係疑似特首喎，你叫我返工？」台下即刻爆笑，估唔到疑似特首同前高官走埋一齊，會有咁搞笑嘅化學作用喎，為咗全港市民嘅笑聲着想，CY第日真係選特首，不妨搵肥亨埋班吖！
派卡片明玩蘇錦樑
CY同肥亨難得上台表演棟篤笑，梗係出盡法寶，尋晚大會請一名女立法會議員着性感雪紡行Catwalk，CY話，記得三十年前有個英國人着一襲紅色雪紡亮相，第日成為所有報章焦點，「唔知今晚嘅焦點又喺邊度呢」？CY竟然講踩界黃色笑話，真係好博喎。肥亨就攞佢嘅前下屬、商務及經濟發展局副局長蘇錦樑嚟玩，一上台就向人派卡片，不過講明係香港大學「無糧」教授嘅名片，「唔可以當入息證明㗎！」
謝偉俊罰白姐姐？
自由黨「新星」方國珊尋日都有現身酒會，仲代表自由黨，攞支紅酒嚟拍賣，最後由CY以三萬八千蚊投得，CY都算出錢出力。「謝白戀」主角謝偉俊同白韻琴就自傳出「查數」傳聞後，首度以「拍拖更」姿態示人，兩人拒絕回應傳聞，白小姐膝頭包紮住，講笑話，係謝偉俊罰佢跪玻璃。
卓妮