政務司司長唐英年架「CS」座駕尋日遇上「交通意外」，特首答問大會開始前，空車駛入立法會停車場時，右車胎碌過一名保安主任嘅左腳背，要警員到場調查。肇事司機並非別人，正係○二年居留權人士圍堵前保安局局長座駕時，護主有功嘅資深政府司機「榮哥」，今次車傷人都算老貓燒鬚！
六十歲嘅榮哥早年一直留守保安局，服侍過七任保安局局長，由港英年代嘅戴宏志到○三年後嘅李少光，有「保安局字典」稱譽，而且出名揸車小心，多年來保持「零抄牌」，點知尋日打爛齋缽。
立法會秘書處解釋，尋日下午三點特首答問大會舉行之前，榮哥駛架空車入立法會停車場，當時有一名保安主任背住企喺通道側邊，當架車駛過，咁啱保安大哥轉身，於是就釀成交通意外。至於係保安大哥隻腳隊出咗定係司機失誤，就要交畀警方調查。
奇在保安大哥隻腳被車轆過，初時一啲唔覺痛，過咗一陣先至發覺唔妥，要報警兼召救傷車入院驗傷。政府「AM」車遇交通意外，按規矩一定要報警投案，於是榮哥要留喺現場協助調查，答問大會結束後，唐唐惟有坐另一部「AM」車走，對座駕遇交通意外無回應。