豬流感（Ｈ１Ｎ１甲型流感）疫症在歐美各國蔓延，美國確診個案更高達三千幾宗，但檢疫措施寬鬆到嚇親人，不但沒有在口岸要求旅客申報健康，機場又無測溫儀器，其他國家真係多得佢唔少。有仔女在英國讀書嘅行政會議召集人梁振英（CY）及發展局局長林鄭月娥，都擔心疫情擴散，CY太太仲緊張到親自空運大批口罩到英國畀仔女應急。
娥姐叫囝囝勤洗手
尋日又到行會星期四午宴（Thursday Lunch），CY照舊揸莊招呼賓客，除咗娥姐，馬會主席陳祖澤都到場湊熱鬧。CY三個仔女傳昕、齊昕和頌昕都喺英國讀書，歐美疫情嚴重，CY坦言無計可施，惟有打密啲長途電話畀仔女，叮囑佢哋勤洗手，切忌攬頭攬頸，最好長戴口罩，做足防疫措施，自求多福。
不過，CY大呻英國出售嘅口罩好昂貴，事關賣一英鎊一個，即係近十二港元，卓妮聽到都打個突，十足奸商發死人財搶錢。CY掃咗大批口罩準備送過英國，但礙於工作繁忙未能親自送貨，於是將重任交畀太太，今日起程前往英國探望仔女，順便空運口罩到英國。至於有兩個仔喺英國讀書嘅娥姐，雖然無打算親自過英國，但都叮囑囝囝勤洗手，萬事小心。
盧文端歐遊冇有怕
本身有仔女喺外國讀書就無得好講，但全國政協盧文端就無有怕，安排就讀聖士提反書院嘅愛女，暑假到英國倫敦皇家音樂學院參加為期兩星期嘅音樂課程，學費高達三至四萬元，點解咁貴？因為盧太跟埋去陪讀。愛女完成課程後，盧文端會同外父外母坐頭等機飛去與太太及愛女會合，一家到法國旅行玩番十日八日，佢拍晒心口話，做足防疫措施就唔使驚。
講開又講，近期頻頻傳出CY短期內會宣布參選特首，所以人氣爆燈，無處不在，尋日就牽頭搞咗個氣候變化商界論壇。問CY有關傳聞係咪真確？CY笑笑口，話自己一直好關心環保和減排議題，同參選特首係兩回事喎。即使卓妮再三追問，CY嘅答案都係一樣，但可以肯定嘅係，佢無否認到參選特首呢個傳聞。
卓妮