好啦，尋晚酒店卒之解封，夾啱星期五晚，商戶以為守得雲開見月明，生意會有啲起色啦。點知酒店的而且確係解咗封，裏面嘅住客職員可以脫苦海甩難，但周圍嘅道路無端端封咗成六粒鐘，市民想過嚟幫襯都嫌麻煩啦，商戶被迫繼續拍烏蠅，仲唔鬼殺咁嘈咩！
鬼咩，政府唔知發咗乜嘢神經，灣仔維景酒店雖然尋晚八點幾至正式解封，之但係下晝四點零開始，已經將港島主要幹道軒尼詩道一段東行線封閉，直至晚上十點幾先至解封，超過四十條巴士路線受影響需要改道。
其實使乜咁大陣仗吖？○五年世貿會議夠勁啩，各地政要雲集香港，又有出晒名激進嘅韓農踩場，當局嗰時集中封內街，軒尼詩道都只係封一陣，時間亦冇今次咁耐。呢次提早封路嘅原因真係巴閉咯，港府話喎，原來係要預備車輛運走旅客。
喂，依家酒店內又唔係有二十幾萬人，得二百幾人咁大把，又證明全部冇中招，人哋有手有腳，行得走得，嗰度係灣仔，唔通班官蠢到以為灣仔同大網仔、三門仔一樣係人迹罕至嘅地方呀？使唔使封幾個鐘運人走呀？
最弊係唔知邊個蠢官咁大整蠱，遲唔揀早唔揀，揀正喺放工繁忙時間封路。連三歲細路仔都知啦，灣仔軒尼詩道係主要幹道，封咗好易搞到交通亂晒大龍。咁簡單嘅道理，有乜理由專門管交通運輸系統嘅運輸署唔知？其實邊係唔知吖，好明顯成個特區政府做騷做到上晒癮，做到欲罷不能啦！
事實上，今次豬流感殺到，成個特區政府神經過敏，無必要嘅防疫騷做到過晒火，但對於防疫把關就翹埋手唔理。
冇錯，正所謂唔怕一萬，最怕萬一，防疫呢家嘢當然係寧緊莫鬆，所以今次封酒店本來係無可厚非。但係封到變成擾民，就真係有啲走火入魔，特區政府呢頭叫小市民唔使恐慌，嗰頭又一味靠嚇，其實所有恐慌嘅根源，都係因為有一個周一嶽喺度！
周一嶽話嚴陣以待第一個病人嚟香港，多得佢把烏鴉口，話口未完就嚟咗第一個墨西哥病人。唔好以為佢老哥夠晒先知先覺呀，分明就係周一嶽把關不力就真。話唔定遲啲豬流感由海陸空三路來犯，要喺油尖旺、銅鑼灣、灣仔等旺區搵啲酒店畀病人隔離，到時周一嶽咪唔憂冇防疫騷做囉！
周一嶽呀周一嶽，咪以為今次符碌過關就當冇事呀，豬流感唔係講玩，唔好再吹水靠嚇當防疫得唔得？睇緊啲當幫忙啦！不過咁，信港府不如信功夫茶，喺度再畀防疫四字真言大家，係乜？好簡單，就係自——求——多——福！